|
និពន្ធដោយ Sok Kim
|
|
ថ្ងៃសុក្រ ទី24ខែឧសភាឆ្នាំ2013ម៉ោង03:07 |
|
កំពង់ចាមៈ ពិធីបើកបវេសនកាលឆ្នាំសិក្សា ២០១៣-១៤ នៃពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន កំពង់ចាម បានប្រព្រឹត្តឡើងក្រោមព្រះអធិបតីភាព ព្រះនាគមុនី ខៀវ ហម ព្រះមេគណខេត្តកំពង់ចាម និងជាតំណាងដ៏ខ្ពង់ខ្ពស់សម្តេចព្រះអគ្គាធិការពុទ្ធិកសិក្សាជាតិ និងលោក មិន ឃិន រដ្ឋមន្ត្រីក្រសួងធម្មការនិងសាសនា ព្រមទាំងសមណសិស្សជាច្រើនអង្គនាក់ កាលពីរសៀលថ្ងៃទី២៣ ខែឧសភា ឆ្នាំ២០១៣ នាបរិវេណវត្តសុទស្សនារាម ស្ថិតនៅសង្កាត់បឹងកុក ក្រុងកំពង់ចាម ខេត្តកំពង់ចាម។
លោក មិន ឃិន បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចជាកាលតែងតែគិតគូខ្ពស់ ដល់ការគង់នៅរៀនសូត្ររបស់ ព្រះសង្ឃ និងជីវភាពរស់នៅរបស់ប្រជាពលរដ្ឋដែលពីមួយថ្ងៃទៅមួយថ្ងៃកាន់តែមានភាពល្អប្រសើរជាលំដាប់។ លោកបានបញ្ជាក់ផងដែរថា ព្រះពុទ្ធសាសនាគឺជាសាសនារបស់រដ្ឋ និងមានឈ្មោះល្បីល្បាញទូទាំងពិភពលោក និងជាកន្លែងស្ងប់អារម្មណ៍សម្រាប់ប្រជាពលរដ្ឋទាំងអស់ ជាពិសេសវត្តអារាម ជាមជ្ឈមណ្ឌលមួយ សម្រាប់ប្រៀនប្រដៅឲ្យមនុស្សចេះស្រលាញ់គ្នា សាមគ្គីគ្នា និងជាកន្លែងអប់រំមនុស្សដ៏សំខាន់ ទើបរាជរដ្ឋាភិបាលចាត់ទុកថា ព្រះពុទ្ធសាសនាជាសាសនារបស់រដ្ឋ។ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យពុទ្ធចក្រនិងអាណាចក្រ ដើរទន្ទឹមគ្នា ទើបបានធ្វើឲ្យប្រទេសកម្ពុជាទទួលបានការរីកចំរើនយ៉ាងឆាប់រហ័ស ព្រោះប្រទេសជាតិមានស្ថិរភាពនយោបាយ សន្តិភាព មានតែមនុស្សមានគុណធម៌ ប្រជាជនមានចិត្តសណ្តោសប្រណីគ្នាទៅវិញទៅមក។
លោករដ្ឋមន្ត្រីក្រសួងធម្មការនិងសាសនា បានទូលប្រគេនបន្តទៀតថា យោងមាត្រា៦៨បានចែងថា រដ្ឋផ្តល់កិច្ចការអប់រំផ្នែកបឋម និងមធ្យមសិក្សានៅតាមគ្រឹះស្ថានសាធារណៈ សម្រាប់ប្រជាពលរដ្ឋគ្រប់រូបដោយឥតបង់ថ្លៃ។ ប្រជាពលរដ្ឋត្រូវបានទទួលការអប់រំយ៉ាងតិចប្រាំបួនឆ្នាំ។ រដ្ឋជួយផ្សព្វផ្សាយ និងលើកតម្កើងសាលាបាលី និងពុទ្ធិកសិក្សា។ គ្រឹះស្ថានពុទ្ធិកសិក្សាមិនត្រឹមតែបានបម្រើចំពោះបុព្វជិតបានសិក្សារៀនសូត្រប៉ុណ្ណោះទេ ប៉ុន្តែថែមទាំងបានទទួលគ្រហស្ថទាំងពីរភេទបានទទួលចំណេះដឹងផងដែរ លើផ្នែកភាសាបាលី និងសំស្រ្កឹត និងទស្សនវិជ្ជា-ពុទ្ធសាសនា។
ព្រះឧត្តមប្រីយ៍ជា អន ធានអាន ព្រះសាកលវិទ្យាធិការ នៃពុទ្ធិកសាកលវិទ្យាល័យសម្តេចអគ្គមហាសេនា បតីតេជោ ហ៊ុន សែន កំពង់ចាម មានសង្ឃដីកាថ្លែងអំណរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសប្បុរសជនទាំងអស់ ដែលបានធ្វើឲ្យផុសឡើង នូវពុទ្ធិកសាកលវិទ្យាល័យនេះឡើង។ ព្រះឧត្តមប្រីយ៍ជា អន ធានអាន មានសង្ឃដីកាពីសមិទ្ធផលលើការបណ្តុះបណ្តាល សមណនិស្សិត-និស្សិត នៅឆ្នាំសិក្សា ២០១១-១២ បានបញ្ចប់ការសិក្សាចំនួន ៣០ អង្គ-នាក់ និងឆ្នាំសិក្សា ២០១២-១៣ បានចំនួន ២៨ អង្គ-នាក់៕
បើកបវេសនកាលឆ្នាំសិក្សា២០១៣-១៤នៃពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន កំពង់ចាម
 
|
|
|
និពន្ធដោយ Sok Kim
|
|
ថ្ងៃពុធ ទី22ខែឧសភាឆ្នាំ2013ម៉ោង12:36 |
|
រាជធានីភ្នំពេញៈ ព្រឹកថ្ងៃទី២២ ខែឧសភា ឆ្នាំ២០១៣ នាទីស្តីការក្រសួងធម្មការនិងសាសនា លោក មិន ឃិន រដ្ឋមន្ត្រីក្រសួងធម្មការនិងសាសនា បានអនុញ្ញាតិឲ្យគណៈប្រតិភូព្រះសង្ឃនៃព្រះរាជាណាចក្រថៃ ដឹកនាំដោយព្រះស៊ីវិសុទ្ធិគុណ មេគណស្តីទីខេត្តសុរិន្រ្ទ និងជានាយកចាងហ្វាងសកលវិទ្យាល័យ មហាវិទ្យាល័យ មហាចុឡាលងករណ៍រាជវិទ្យាល័យ និមន្តជួបសម្តែងការគួរសម ក្នុងបំណងស្វែងយល់ពីការរីកចំរើនព្រះពុទ្ធសាសនានៅ កម្ពុជា។
លោក មិន ឃិន រដ្ឋមន្ត្រីក្រសួងធម្មការនិងសាសនា មានប្រសាសន៍ទូលប្រគេនពីការរីកចំរើនលើវិស័យ សាសនានៅកម្ពុជា ក្រោមការដឹកនាំប្រកបដោយគតិបណ្ឌិតខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយសាសនាទាំងនោះបានកំពុងជ្រោកកោនក្រោមដំបូលរដ្ឋ ធម្មនុញ្ញតែមួយ និងបានកំពុងពួនជ្រករួបរួមគ្នា កសាងសង្គមជាតិមួយ ឲ្យទទួលបានសុខសន្តិភាពទាំងផ្លូវកាយ និងផ្លូវចិត្ត។ ជាពិសេសព្រះសាសនាបានកំពុងដើរតួនាទីយ៉ាងសំខាន់ ក្នុងការលើកកម្ពស់ការអប់រំ ចរិយាធម៌ សីលធម៌ក្នុងការកសាងសង្គមជាតិទាំងមូល ដើម្បីចូលរួមចំណែកជាមួយរាជរដ្ឋាភិបាលក្នុងការលើកតម្កើងវិស័យព្រះពុទ្ធសាសនាដែលជាសាសនារបស់រដ្ឋ។
លោករដ្ឋមន្ត្រីបានទូលប្រគេនបន្តទៀតថា ព្រះពុទ្ធសាសនានៅកម្ពុជា មានពីរនិកាយគឺគណៈមហានិកាយ និងគណធម្មយុត្តិកនិកាយ នៃព្រះរាជាណាចក្រកម្ពុជា ដែលនិកាយទាំងពីរនេះ កំពុងរស់នៅយ៉ាងសុខដុមរម្យនា ក្នុងនោះវត្តគណមហានិកាយមានចំនួន៤,៣៨០វត្ត, អាស្រម២០៧ ចំណែកគណៈធម្មយុត្តិកនិកាយមាន១៧៣វត្ត។ ព្រះសង្ឃទូទាំងប្រទេសមានចំនួន៥៣,២៧៥អង្គ ក្នុងនោះព្រះសង្ឃគណៈមហានិកាយមាន ៥១,៨៧២ អង្គ ក្នុងនោះភិក្ខុ ២១,៣០៨ អង្គ និងព្រះសង្ឃគណៈធម្មយុត្តិកនិកាយមានចំនួន ១,៣៨៥ អង្គ និងមានភិក្ខុ ៤៤៥ អង្គ។ ចំណែកវិស័យពុទ្ធិកសិក្សាជាតិនៅព្រះរាជាណាចក្រកម្ពុជាមានសាលាពុទ្ធិកបឋមសិក្សាមានចំនួន ៨៥៥ កន្លែង សាលាពុទ្ធិកមធ្យមសិក្សាទុតិយភូមិមាន ៣៣ សាលា សាលាពុទ្ធិកសាកលវិទ្យាល័យ ចំនួន៣កន្លែង នៅភ្នំពេញ ២កន្លែងគឺ ពុទ្ធិកសាកលវិទ្យាល័យព្រះសីហនុរាជ និងពុទ្ធិកសាកលវិទ្យាល័យព្រះសីហមុនីរាជា និងនៅខេត្តកំពង់ចាម ១កន្លែងគឺ ពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន កំពង់ចាម និងមានសមណសិស្ស និស្សិតកំពុងសិក្សាមានជាង៣ម៉ឺនអង្គ។
ព្រះស៊ីវិសុទ្ធិគុណ មេគណស្តីទីខេត្តសុរិន្រ្ទមានសង្ឃដីកាកោតសរសើរចំពោះរាជរដ្ឋាភិបាលកម្ពុជាក្នុងការដឹកនាំវិស័យសាសនាឲ្យមានការរីកចំរើន ជាពិសេសវិស័យព្រះពុទ្ធសាសនាដែលជាសាសនារបស់រដ្ឋ៕
គណៈប្រតិភូព្រះសង្ឃនៃព្រះរាជាណាចក្រថៃ និមន្តពិភាក្សាការងារជាមួយរដ្ឋមន្ត្រីធម្មការ
|
|
និពន្ធដោយ Sok Kim
|
|
ថ្ងៃព្រហស្បតិ៍ ទី09ខែឧសភាឆ្នាំ2013ម៉ោង12:31 |
|
ភ្នំពេញៈ ព្រឹកថ្ងៃទី៩ ខែឧសភា ឆ្នាំ២០១៣ លោក KONSTANTIN KOSACHEV ប្រធានទីភ្នាក់ងារសហព័ន្ធ រុស្សីទទួលបន្ទុកសហប្រតិបត្តិការមនុស្សធម៌អន្តរជាតិ អាណិកជនរុស្សុីរស់នៅបរទេស និងសម័្ពន្ធរដ្ឋឯករាជ្យ បាន អញ្ជើញចូលជួបសម្តែងការគួរសមជាមួយលោក មិន ឃិន រដ្ឋមន្ត្រីក្រសួងធម្មការនិងសាសនា ដើម្បីបន្តនូវការពង្រីកទំនាក់ទំនងរវាងប្រទេសទាំងពីរ ដែលមានជាច្រើនទស្សវត្តមក។
ក្នុងជំនួបនេះ លោក មិន ឃិន មានប្រសាសន៍ថ្លែងអំណរគុណចំពោះប្រទេសរុស្សុី ដែលបានជួយដល់ប្រទេសកម្ពុជា ក៏ដូចជាប្រជាជនកម្ពុជាកន្លងមក ដែលកម្ពុជាបានក្រោកឈរឡើងវិញបន្ទាប់ពីបានផ្តួលរំលំ របបបីឆ្នាំប្រាំបីខែនិងម្ភៃថ្ងៃ។ ទាំងនេះជាគុណូបការៈដែលមិនអាចកាត់ផ្តាច់ចេញបានឡើយហើយប្រទេសរុស្សី បានបន្សល់កេរ្តិ៍តំណែលជូនប្រជាជនកម្ពុជា នូវអាគារមន្ទីរពេទ្យមិត្ដភាពខ្មែរសូវៀត និងវិទ្យាស្ថានបច្ចេកទេសកម្ពុជា ព្រមទាំងបានជួយបណ្ដុះបណ្ដាលធនធានមនុស្សមកអភិវឌ្ឍន៍ ប្រទេសប្រកបដោយភាពរីកចម្រើន ហើយថ្មីៗនេះអ្នកវិនិយោគគិនរុស្សីបានមកដាក់ទុកលើវិស័យទេសចរណ៍ ដោយបានសាងសង់ស្ពានកោះពស់ លើទឹកដីខេត្ដព្រះសីហនុ ដែលទាំងនេះបញ្ជាក់ឱ្យឃើញថា ការទំនាក់ទំនងទ្វេភាគីរវាងប្រទេសទាំងពីរពិតជាមានតម្លៃខ្លាំងណាស់។
លោករដ្ឋមន្ត្រីក្រសួងធម្មការនិងសាសនាមានប្រសាសន៍លើកឡើង ពីតួនាទីរបស់ក្រសួងដែលជាសេនាធិការមួយឲ្យរាជរដ្ឋាភិបាលកម្ពុជា ក្នុងការដឹកនាំ និងគ្រប់គ្រងសាសនាទាំងអស់សំដៅរួមគ្នាកសាងសន្តិភាពផ្លូវចិត្ត ដល់ប្រជាពលរដ្ឋ មិនត្រឹមតែប៉ុណ្ណោះសាសនាទាំងនោះក៏បានចូលរួមជាមួយរាជរដ្ឋាភិបាលលើការងារសង្គមកិច្ចផងដែរ នេះបញ្ជាក់ឲ្យឃើញពីការរួបរួមរវាងសាសនាទាំងអស់នៅកម្ពុជាក្រោមតំបូលរដ្ឋធម្មនុញ្ញតែមួយ ជាពិសេសគឺក្រោមការដឹកនាំប្រកបដោយគតិបណ្ឌិតខ្ពស់របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។
លោក មិន ឃិន មានប្រសាសន៍បន្តទៀតថាសាសនាទាំងអស់បានចូលរួមចំណែកយ៉ាងច្រើនដល់ការអភិវឌ្ឍន៍ និងការរក្សានូវសុខសន្តិភាពសម្រាប់សង្គមជាតិទាំងមូល ជាក់ស្តែងវិស័យសាសនាបានប្រៀនប្រដៅមនុស្សឲ្យស្គាល់អំពីសច្ចភាព សុច្ចរិតភាព បុណ្យនិងបាប និងបង្ហាញមាគ៌ាដើម្បីរំដោះខ្លួនពីសេចក្តីទុក្ខ ពោលគឺវៀរចាកអំពើទុច្ចរិតនិងអកុសល វៀរចាកអំពី ទោសៈ មោហៈ និងលោភៈ ដើម្បីធ្វើដំណើរឆ្ពោះទៅត្រើយនៃសេចក្តីស្ងប់ ។
ជាការឆ្លើយតប លោក KONSTANTIN KOSACHEV ប្រធានទីភ្នាក់ងារសហព័ន្ធរុស្សីទទួលបន្ទុកសហប្រតិបត្តិការមនុស្សធម៌អន្តរជាតិ អាណិកជនរុស្សីរស់នៅបរទេស និងសម័្ពន្ធរដ្ឋឯករាជ្យមានប្រសាសន៍ថា ការទំនាក់ទំនងរវាងប្រទេសទាំងពីរមានតាំងពីយូរលង់ណាស់មកហើយ។ ការសម្ដែងការគួរសមនាពេលនេះ ក្នុងគោលបំណងពង្រឹងពង្រីកចំណងសាមគ្គីភាព ក្នុងក្របខណ្ឌកិច្ចសហប្រតិបត្ដិការ បន្ថែមលើគ្រប់វិស័យ ដោយមានមោទនភាព ក្នុងការវិភាគទានលើផ្នែកធនធានមនុស្សនិងជំរុញអ្នកវិនិយោគទុនរុស្សីមកធ្វើការវិនិយោគនៅកម្ពុជាឱ្យកាន់តែច្រើនលើគ្រប់វិស័យ៕
ប្រធានទីភ្នាក់ងារសហព័ន្ធរុស្សី ទទួលបន្ទុកសហប្រតិបត្តិការមនុស្សធម៌អន្តរជាតិ ជួបសម្តែងការគួរសម
|
|
និពន្ធដោយ Sok Kim
|
|
ថ្ងៃអង្គារ ទី21ខែឧសភាឆ្នាំ2013ម៉ោង12:26 |
|
ភ្នំពេញៈ ព្រឹកថ្ងៃទី៩ ខែឧសភា ឆ្នាំ២០១៣ លោក មិន ឃិន រដ្ឋមន្ត្រីក្រសួងធម្មការនិងសាសនា និងលោកស្រី ជាភរិយា បានអញ្ជើញជាអធិបតី ក្នុងពិធីបើកបវេសនកាលឆ្នាំសិក្សា២០១៣-១៤ នៅពុទ្ធិកអនុវិទ្យាល័យសម្តេចព្រះវនរ័ត ណយ ច្រឹក ច័ន្ទបុរីវង្ស ស្ថិតនៅសង្កាត់សំរោង ខណ្ឌសែនសុខ រាជធានីភ្នំពេញ។
មានប្រសាសន៍ក្នុងឱកាសនោះ លោក មិន ឃិន បានលើកឡើងថា បច្ចុប្បន្នរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់គិតគូរអំពីសុវត្ថិភាព ជីវភាពរស់នៅរបស់ព្រះសង្ឃក៏ដូចជាប្រជាពលរដ្ឋនៅទូទាំងប្រទេស ហើយអ្វីដែលយើងទាំងអស់គ្នាកំពុងចាប់អារម្មណ៍ និងយកចិត្តទុកដាក់ពេលនេះគឺការស្តារឡើងវិញនូវការខូចខាតប្រព័ន្ធហេដ្ឋារចនាសម្ព័ន្ធ ស្ពាន ផ្លូវ សាលារៀន មន្ទីរពេទ្យ និងវត្តអារាម។ ប៉ុន្តែអ្វីៗទាំងអស់នេះគឺបានមកពីការដឹកនាំដ៏ត្រឹមត្រូវរបស់ប្រមុខរាជរដ្ឋាភិបាលកម្ពុជា ដែលមានការដឹកនាំប្រកបដោយគតិបណ្ឌិត និងភាពឈ្លាសវៃរួមទាំងស្មារតីស្នេហាជាតិ ស្នេហាប្រជាពលរដ្ឋ និងប្រទេសជាតិគ្រប់កាលៈទេសៈ។
លោករដ្ឋមន្ត្រីក្រសួងធម្មការនិងសាសនា បានទូលប្រគេនបន្តទៀតថា យោងមាត្រា៦៨បានចែងថា រដ្ឋផ្តល់កិច្ចការអប់រំ ផ្នែកបឋម និងមធ្យមសិក្សានៅតាមគ្រឹះស្ថានសាធារណៈ សម្រាប់ប្រជាពលរដ្ឋគ្រប់រូបដោយឥត បង់ថ្លៃ។ ប្រជាពលរដ្ឋ ត្រូវបានទទួលការអប់រំយ៉ាងតិចប្រាំបួនឆ្នាំ។ រដ្ឋជួយផ្សព្វផ្សាយ និងលើកតម្កើងសាលាបាលី និងពុទ្ធិកសិក្សា។ ក្រោមការយកចិត្តទុកដាក់ខ្ពស់ និងការដឹកនាំប្រកបដោយការឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា វត្តអារាមនៅទូទាំងប្រទេសមានជាង៤ពាន់វត្ត និងព្រះសង្ឃជាង៥ម៉ឺនអង្គ និងមានសាលាពុទ្ធិកបឋមសិក្សាមានចំនួន៨៥៥កន្លែង សាលាពុទ្ធិកមធ្យមសិក្សាទុតិយភូមិមាន៣៣សាលា សាលាពុទ្ធិកសាកលវិទ្យាល័យចំនួន៣កន្លែងនៅភ្នំពេញ២កន្លែងគឺពុទ្ធិកសាកលវិទ្យាល័យព្រះសីហនុរាជ និងពុទ្ធិកសាកលវិទ្យាល័យព្រះសីហមុនីរាជា និងនៅខេត្តកំពង់ចាម ១កន្លែង គឺពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន កំពង់ចាម។
ព្រះភិក្ខុរត្ខិតរតនោ ហ៊ឹម ចន្ទថន នាយករងពុទ្ធិកអនុវិទ្យាល័យសម្តេចព្រះវនរ័ត ណយ ច្រឹក ច័ន្ទបុរីវង្ស មានសង្ឃដីកាថា ក្នុងឆ្នាំសិក្សា ២០១២-១៣ កន្លងមក នៅសាលាពុទ្ធិកបឋមសិក្សាជេដ្ឋាឧត្តម មានសមណសិស្សចំនួន៩៩អង្គ ក្នុងនោះភិក្ខុ១០អង្គ សាមណេរ៨៩អង្គ និងមានគ្រូឧទ្ទេសាចារ្យចំនួន២០អង្គ/នាក់។ ដោយ ឡែកសម្រាប់ឆ្នាំសិក្សា២០១៣-១៤នេះ សាលាពុទ្ធិកបឋមទទួលបានសមណសិស្សចូលរៀនចំនួន១០៥អង្គ ភិក្ខ១០អង្គ និងសាមណេរ៩៥អង្គ។ ដោយឡែកចំពោះពុទ្ធិកអនុវិទ្យាល័យសម្តេចព្រះវនរ័ត ណយ ច្រឹក ច័ន្ទបុរីវង្ស សម្រាប់ឆ្នាំសិក្សាថ្មីនេះទទួលសមណសិស្សឲ្យចូលរៀនទាំងបីកំរិតរហូតទៅដល់១២០អង្គ។
ក្នុងឱកាសអញ្ជើញជាអធិបតីពិធីបើកបវេសនកាលឆ្នាំសិក្សា២០១៣-១៤ លោក មិន ឃិន និងលោកស្រីជាភរិយាបានឧបត្ថម្ភថវិកា១លានរៀល និងប្រកាសបើកបវេសនកាលឆ្នាំសិក្សាថ្មីចាប់ពីពេលនេះតទៅ៕
 
|
|
និពន្ធដោយ Sok Kim
|
|
ថ្ងៃអាទិត្យ ទី19ខែឧសភាឆ្នាំ2013ម៉ោង12:20 |
|
កំពង់ចាមៈ ភាពរីកចំរើនលើគ្រប់វិស័យនិងសុខសន្តិភាព ស្ថេរភាពនយោបាយសង្គមនៅទូទាំងប្រទេសនាពេលបច្ចុប្បន្ននេះគឺកើតឡើងដោយសារការដឹកនាំប្រកបដោយភាពទទួលខុសត្រូវរបស់ថ្នាកដឹកនាំកំពូលៗនៃគណបក្សប្រជាជនកម្ពុជាជាពិសេសក្រោមការដឹកនាំរបស់សម្តេចទាំងបី។ មានប្រសាសន៌លើកឡើងយ៉ាងដូច្នេះ នៅពេលដែល លោក មិន ឃិន ប្រធានគណៈពង្រឹងចុះជួយស្រុកកងមាសអញ្ជើញចុះជួបសំណេះសំណាលជាមួយ សមាជិក សមាជិកគណបក្សប្រជាជនកម្ពុជាចំនួនបីឃុំគឺឃុំកងតាំណឹង ឃុំព្រែកក្របៅ និងឃុំពាមជីកង ស្ថិតក្នុង ស្រុកកងមាស ខេត្តកំពង់ចាម កាលពីថ្ងៃទី១៤ ខែឧសភា ឆ្នាំ២០១៣។
មានប្រសាសន៌សំណេះសំណាលនាឱកាសនោះ លោក មិន ឃិន សូមថ្លែងអំណរគុណយ៉ាងជ្រាលជ្រៅ ចំពោះសមាជិក សមាជិកាទាំងអស់ដែលបានកំពុងបន្តគាំទ្រគណបក្សប្រជាជនកម្ពុជា។ លោក បានលើកឡើង ពីសច្ចធម៌ជាប្រវត្តិសាស្ត្រដែលពុំមាននរណាអាចកែប្រែបានគឺសុខសន្តិភាព ស្ថេរភាពនិងការអភិវឌ្ឍសំបូរសប្បាយហើយសមិទ្ធផលទាំងនេះជាស្នាដៃប្រវត្តិសាស្ត្ររបស់សម្តេចអគ្គមហាធម្មពោធិសាល ជា ស៊ីម ប្រធាន ព្រឹទ្ធសភា សម្តេចអគ្គមហាពញចក្រី ហេង សំរឹន ប្រធានរដ្ឋសភា ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលជាថ្នាក់ដឹកនាំដ៏ឆ្នើម ជាស្ថាបនិក៧មករា ១៩៧៩ ជា ស្នូលគ្រប់គ្រងដឹកនាំប្រទេសជាតិតាមរយៈនយោបាយឈ្នះៗដែលបានបញ្ចប់សង្គ្រាមទាំងស្រុងនិងបានជាមូលដ្ឋានគ្រឹះក្នុងការកសាងប្រទេសជាតិទាំងផ្នែកពុទ្ធចក្រនិងអាណាចក្រ។
លោក មិន ឃិន បានក្រើនរំលឹកចំពោះមន្ត្រីគណបក្សប្រជាជនកម្ពុជានៅមូលដ្ឋានឲ្យបន្តធ្វើអំពើល្អ ព្រោះ គ្មានអ្វីប្រសើរជាងការធ្វើល្អនោះទេដែលតម្រូវឲ្យមន្ត្រីបក្សខិតខំបង្កើនសមាជិកថ្មីដោយផ្តោតទៅលើក្រុមយុវជនដែលជាកម្លាំងស្នូលសម្រាប់បន្តវេននិងបន្តចុះអប់រំផ្សព្វផ្សាយពីគោលនយោបាយបក្សដើម្បីភាពរឹងមាំទាំងទស្សនៈសន្តិអារម្មណ៍និងការចាត់តាំង។ លោកក៏បានអំពាវនាវថានៅពេលខាងមុខនេះជាវេលាជ្រើសរើសថ្នាក់ដឹកនាំប្រទេសជាតិដូចនេះបើស្រលាញ់ ហ៊ុន សែន អាណិត ហ៊ុន សែន ពេញចិត្ត ហ៊ុន សែន ជឿជាក់លើ ហ៊ុន សែន សូមបោះឆ្នោតជូនគណបក្សប្រជាជនកម្ពុជានៅថ្ងៃទី២៨ ខែកក្កដាឆ្នំា២០១៣។
សមាជិក សមាជិកាទាំងបីឃុំមានចំនួន១,៨០៨នាក់បានបន្តគាំទ្របោះឆ្នោតជូនសម្តេចអគ្គមហាសេនា បតីតេជោ ហ៊ុន សែន ជានាយករដ្ឋមន្ត្រីនៅអាណត្តិទី៥និងអាណត្តិក្រោយៗទៀត។
តមក លោក មិន ឃិន ប្រធានក្រុមការងារចុះជួយស្រុកកងមាសនិងលោកស្រីជាភរិយាបានជូនថវិកាដល់អ្នកចូលរួមទាំង១,៨០៨នាក់ ម្នាក់ៗមួយម៉ឺនរៀលជាការកំដរដៃ៕ |
|
|
|
|
|
